ঈদর প্রস্তুতি

ঈদর প্রস্তুতি


 শাহারা খান
 
গাইল-ছিয়া আনোরে ধইয়া,
গুড়ি চাইরটা কুটিলাই।
নাইকলগুন খুরছিলাও,
ফব কয়টা বানাইলাই।

খেজুরর বুয়াইম সামনে তও,
ঈদগাঁত যাইতে খাইবা।
দুধ ফুটাইন তও জ্বাল দিয়া,
তাইন সাওই খাইতে চাইবা।

তৈলর টিন খালি অইগেছে,
জলদি আনো কিনিয়া।
নাইলে তাইন গরম অইযাইবা,
হান্দেশ বাজমু কিতা দিয়া।

ঘর দরজা আবো হুরলাম না,
কুটুম আইব্বা কতজন।
কিতা থনে কিতা করতাম,
মাথায় করের ঠনঠন।

কাপড়খান ইস্তরি দিলাম না,
কওছাই কেমনে ফিনতাম?
হাতর কাম শেষ অর না,
একজরা মেন্দি কেমনে মাখিতাম।

হকলরউ অবসর আছে,
ঈদর দিন গাঁও ফাখাইবার।
বেটিনন্তর আর ফুরসত নাই,
উন্দাল তনে বারওইবার।