অভ্যাস নষ্ট
শাহারা খান
কইলে খালি গোসা করো,
এরলাগি কইনা ঢরাইয়া।
বাফর বাড়ি যাইতে চাইলে,
চাও তুমি চউখ রাঙাইয়া।
বিয়ার অইলো বত্রিশ বছর,
নাইওর কয়দিন গেলাম?
তোমার সংসারর ঘানি টানিয়া,
জোয়ান কালো বুড়ি অইলাম।
কান্দাখানো বইয়া একবার,
খুশ মিজাজে মাতোনা।
মনর কত কথা আছিল,
একবার হুনতে চাওনা।
ঘরো আইয়া মিজাজ গরম,
জানে পরাণে করি খেদমত।
আমি জরিনার রূপ দেখার,
পাওনা তুমি ফুরসত।
দুইটা দিন বাফর বাড়ি গিয়া,
পারিনা নাইওর করতাম।
ফনর উপরে ফন করো,
কোনদিন ফিরত আইতাম।
হকল মতলব বুঝছি তোমার,
রান্ধিয়া খাওয়া কষ্ট।
আমি জরিনায় লাই দিয়া,
অভ্যাস করছি নষ্ট।
